مرة جالي في عيادتي الخاصة شاب صغير عنده إنزلاق غضروفي كبير في ظهره، و كان محتاج يعمل عملية لإستئصال الغضروف.
كان شاب بسيط على قد حاله، و ميقدرش يعمل العملية في مستشفى خاص،
فطلبت منه يجيلي مستشفى التأمين الصحي علشان أعمله العملية هناك مجاناً.
الشاب دخل المستشفى و عمل العملية و الأمور كانت ماشية تمام.
بعد العملية بالليل إتصل بي الطبيب المقيم في المستشفي و قالي إن المريض مش عارف يحرك رجليه و عنده إحتباس في البول،
روحت على المستشفى جرى و فحصت الشاب، لقيت إن القدمين الإتنين مش بيتحركوا، و عنده بداية أعراض شلل
مع إن العملية كانت معمولة كويس جداً، و كمان كانت ناحية واحدة بس.
التفسير الوحيد في الحالات إللي زى كده إن يكون حصل نزيف و تجمع دموي بعد العملية ضغط على الأعصاب في العمود الفقري و عمل شلل في القدمين.
للأسف مستشفى التأمين الصحي مكانش فيها جهاز رنين مغناطيسي و جهاز الأشعة المقطعية كان بايظ، فمكنتش عارف أعمل أى فحوصات.
و بالليل مكانش فيه مراكز أشعة فاتحة.
أهل الشاب كانوا حيتجننوا
إبنهم، شاب صغير، نايم قدامهم على السرير مشلول،
و الدكتور معندوش أى تفسير.
و للي مش متخصص في جراحة العنود الفقري، دي حاجة ممكن تكون من مضاعفات الجراحة.
ساعتها قررت أعمل الحاجة الوحيدة إللي اقدر عليها، و دخلت الشاب غرفة العمليات تاني بعد نص الليل،
قررت أستكشف مكان العملية علشان لو كان فيه نزيف أو تجمع دموي ألحقه قبل ما الشلل يزيد.
دخلت الشاب العمليات، و فتحت تاني،
لكن ملقيتش أى نزيف أو تجمع دموي،
مكان العملية كان نضيف و زى الفل.
قفلت تاني، و طلعت المريض غرفته،
و طلبتله جرعات عالية من الكورتيزون كما هو متبع في الحالات دي.
الأهل كانوا كل شوية يسألوا إيه السبب في إللي حصله،