قصه حقيقيه

فطلبنا دكتور أمراض مخ و أعصاب باطني علشان يشوفه،
كان بيجي من القاهرة يومين بس في الأسبوع.
دكتور أمراض المخ و الأعصاب لما شافه قدر يوصل لتشخيص مرض نادر إسمه
Guillain–Barré syndrome
و ده مرض مناعي نادر ملهوش سبب ،
بيجي بالصدفة لواحد كل ١٠٠ ألف،
حاجة كده ملهاش أى علاقة بالعملية،
حظه و حظي إنها جت في الوقت بتاع الجراحة.

أهل المريض مصدقوش كلام دكتور أمراض الأعصاب، و إفتكروا إنه بيقول كده علشان يضحك عليهم و يبرأني من تهمة الخطأ الطبي.

ساعتها أهل المريض أجروا عربية إسعاف و أخدوه على القاهرة علشان يكشفوا عند أكبر دكتور أمراض مخ و أعصاب في البلد.
أستاذ كبير كشفه لوحده أغلى من مرتب أى إنسان عادي في مصر.

طبعاً مكانش ينفع أمنعهم و لا حتى أحاول أشرحلهم إنهم كده بيأخروا العلاج على إبنهم،
كل تفكيرهم ان إزاى يطلعوني غلطان و بعدين يعرفوا ينتقموا مني.

الولد سافر القاهرة و راح للأستاذ الكبير،
الراجل أكد التشخيص، و قالهم إن دا مرض نادر و إنه ملهوش علاقة بالعملية.
و كمان إتصل بيا قدامهم بالتليفون علشان يطمني،
و قالي باللفظ
……إنت ملكش علاقة باللي عنده. إنت بس حظك وحش

الحمد لله ساعتها بس الأهل فهموا إني مش السبب،
و راحوا على مستشفى عين شمس التخصصي و عمل فلترة للدم، و بعد كام يوم الولد خف و بقى زى الفل.

و بعدها بشهر الولد رجع الشغل تاني و الآلام اللي عنده إختفت،
و هو بيشتغل دلوقتي في المعمار،
بيطلع سقالات و بيشيل على ظهره أحمال.

الضغط العصبي إللي شوفته في الكام يوم دول كبروني ٢٠ سنة على الأقل
أسبوعين بحالهم تليفوني مبطلش رن، كل شوية واحد من أهل المريض يتصل و يسأل و يتخانق،
و منهم إللي كان بيهددني تهديد صريح.

أسبوعين لا عارف أنام و لا أكل و لا عارف أشتغل
أسبوعين كل إللي بفكر فيه إزاى الواحد يبطل الشغلانة المُقرفة دي.
كنت حاسس إن الموت أهون عليا من الهم إللي كنت شايله على قلبي ده،
الحمد لله على كل شئ.

الناس لازم تعرف إن الطب مش سحر
و إن الدكاترة مش ربنا علشان يشفوا المرضى،

إحنا مجرد أسباب
بنحاول نشتغل مع العيان بما يرضي الله،
في الآخر
الشفا دا من عند ربنا.

مفيش دكتور مش عايز المريض بتاعه يخف،
أكيد فيه أخطاء، إحنا مش ملائكة،
لكن مفيش حد بيقصد الأذى.
مهما كانت براعة الطبيب و إجتهاده مش حيقدر يمنع القدر.

ربنا يستر علينا كلنا.

Dr: Ahmed Baseem