ابويا

– انتي بتعملي كدا ليه يا حبيبتي

لقيتها بترد بصوت رجولي خشن:

– مفيش أكل في البيت الحقير ده, ولو مجبتش أكل هاكلك انت

حسيت اني اتشليت مكاني, وبالأخص لما شوفت المقص ممسوك في ايدها من المكان الحاد وايديها بتنزف دم, سابتني ومشيت وكل اللي طلبته حاجة واحدة بس, قالتلي انها عايزة عشرة كيلو لحمة يوميا وإلا هتاكل من لحم جسمها, أو اللي قال هو الصوت الرجولي اللي بيطلع منها..

وعدت الليلة وروحت المحل وشوفت في عيون كل الناس نظرات غريبة أوي, وحقيقي بقيت مكسور وسط الناس, واتحولت حياتي لجحيم, أروح يوميا بعشرة كيلو لحمة, اللي هما تقريبا مكسب تلت أيام, واصحا في نص الليل الاقي بنتي بتاكل فيهم بطريقة بشعة, وتصحا الصبح مريضة وتفضل تتألم وترجع دم..

وتفضل تستغيث بيا وتتكلم بصوت وعد, أما بالليل فكان صوتها يقلب ذكوري, وتاكل لحمة نية, وافضل أسمع ضحكها من المطبخ اللي كان بيرعبني, ولما عجزت في مرة أجيب اللحمة سمعت صراخها بالليل ولقتها بتعور نفسها وبتشرب من الدم اللي بينزل منها..

المنطقة كلها عرفوا انها ملبوسة, وحياتي اتدمرت وسُمعة المحل اتضربت, كبرت يجي 20 سنة, وبقيت بموت بالبطئ, لحد ما جتلي في يوم السوق بتضحك بهيستريا وحذرتني وسط الناس إني أرجع البيت ومش معايا اللحمة..

وقعدت على الأرض وحطيت ايدي على راسي, دعيت ربنا إني أموت وبدأت أبكي زي العيل الصغير, افتكرت لما ابويا كان بيطلع أربعة كيلو تقريبا يوميا وكان الشغل مبيخلصش, انا دلوقتي مبشتغلش وبطلع عشرة كيلو, هو ده الستر اللي ابويا كان بيشتريه فعلا ؟؟

ده الستر ده طلع أغلى من كنوز الدنيا كلها, في الوقت ده لقيت راجل كبير بيطبطب عليا وبيقولي, ادبـ,ـح يابني دبيحة لوجه الله وفرقها على الناس, وفيها الشفا ان شاء الله, سألته أجيب الفلوس منين, قالي اتصرف ومنها الشفا والرزق يابني..

وقمت من مكاني وملقتش غيره, الحاج شاكر صاحب ابويا وكبير المدبـ,ـح, روحتله وقولتله إني في كرب وعاوز 30 الف اشتري عِجل سلف, وقتها بص ناحيتي وقالي بالنص

“عشان خاطر أبوك لو هديله عمري قليل عليه, اما عشانك فانت متستحقش جنيه واحد, بس انا هديك الفلوس عشان خاطر عضم الراجل الطيب في تربته”

وخدت الفلوس وانا مكسور وجبت الدبيحة ودبـ,ـحت, ولفيت على بيت بيت من الناس الفقيرة بتوع زمان, بوست على راسهم واحد واحد وطلبت منهم يسامحوني وادتهم اللحمة, قولتلم ادعوا لوعد وادعولي ربنا يرفع عني, وطلعت من عندهم حاسس اني غسلت قلبي, الضيق اللي كان في صدري راح, روحت صليت العشا وبكيت بين ايدين ربنا ورجعت بيتي..

وعلى الفجر لقيت وعد بتصحيني وحالتها صعبة أوي, كانت بتموت, وقالتلي انها شافت حلم غريب أوي, وصفتلي زريبة انا أعرفها وقالتلي شوفت فيها ثعبان اسود عايز يطلع من تحت الأرض, ودخلت نامت, فضلت حيران أوي من الحلم ده وحكيته لراجل عجوز عدى عليا في المحل, قالي أروح الزريبة واحفر يمكن يكون علامة على حاجة..